Imigrassion italiana....la saga sevita!!!
Sexta, 19 de Dezembro de 2014

Domando permesso par rivar nantra olta par sevitar con la stória dea imigrassion dei nostri antenati. Come ghenavemo visto stimana passà, la cosa de pì spression che ga influenssià la imigrassion, ze stata el color bianco dele persone i anca la profission di contadini. Parquela che el goerno brasilian fea de tuto par giutar vegner ntel Brasile i italiani del nord dea Italia, parche savea che zera un pòpolo bianco ( el color che el goerno volea) i che laorea de pì. I anca parche lori vignea con tuta la fameia, cossita no zera mia fácile tornar indrio, medèsimo pentiti pena dopo rivai.

Ze stato cossita che italiani, portoghesi, i dele olte spagnòi, per esser pòpoli con una coltura darente dea brasiliana, capita come i imigranti preferii del goerno brasilian, parche i se similea pì presto ntel Brasile. Se fa bisogno ricordar quà, che el goerno no volea far de tuti imigranti paroni rurai, la granda maioranssa zera solche par doperar i laori brassai ntele piantassion dei café. Parquesto l'imigranti podea ndar par i nuclii coloniai o par le fasende. I nuclii coloniai se ga slevai solche ndoe no ghenavea piantassion de café, una olta che ndoe ghenea café, le tere zeri ciari i no svanssea par piantar altre cose! I fora questo, par farghe i nuclii coloniai no zera mia fàcile, parche ghe ocorea la autorisassion del goerno, che fea come lu volea, parche ghenavea paùra di che tuti sbandonea le fasende par piantar en suo propio toco de tera. Adesso tornemo indrio nantro pochetin fin la Italia, parche ghe ocor parlar sora la sfida che ghenavea i nostri antenati dopo che (perssuadii per i agenti dea emigrassion) dessidea vegner ntel Brasil. La prima cosa a far zera vender tuto che i ghenea ( che no zera tanto cossì); dopo ghe ocorea far un viaio a pìe de raquanti dì, fin rivar ntel porto par ciapar el bastimento. Quei del nord ndea ntel porto di Génova, i quei del sud, ntel porto di Nàpoles. El pedo zera che, i agenti dea emigrassion, combinai con i paroni dei staleri i anca taverni ntel porto, fea i poareti rivar diversi giorni vanti dea partenssa del bastimento, cossì, fin che i restea spetando, vanti ancora de sconmissiar el viaio oltre mare, i disdeti gastea squasi tuto del fià de soldi che ghenavea nte scarsele!!!... Restemo quà incoi, però volendo Dio, stimana che vien sevitemo con la saga dei nostri antenati, quando femo un raconto sora la tribolassion del viaio che i ga patio rento i bastimenti! Pinpianeto betemo rento quà anca fròtole, busìe, ciarla i diverse cose par sbregarsse di rider! Speté solche finir i raconti sora la imigrassion. Strucon i salute!!!

Ouça e divulgue o programa talian Ricordi D’itália na rádio sol d’américa FM 91.1. Todo domingo das 7 às 9 da manhã.

Comentários