Trenta sei giorni di màchina a vapore...ntea mèrica semo rivai!!
Sábado, 27 de Dezembro de 2014

Ècolo brai taliani,...semo rivai nantra olta! Stimana passà ghenavemo visto sora come i nostri antenati i ga fato par vegner fora del suo paese; incoi sevitemo con  la stória i femo un vero viaio insieme con lori rento ntei bastimenti, fando un raconto de tuto che i ga patio fin rivar ntel Brasile! Lora, una olta rento ntel bastimento, i nostri antenati ghenaveva de far un terìbile viaio che durea pì de trenta giorni, tuti imuciai su, dele olte fin insieme con le bèstie! Parquela, no zera ciari i velenamenti par mangiari smarssi, morti per malatìa i tanti furti. Ntel ano de 1888, ntei due bastimenti- el Matteo Bruzzo i Carlo Raggio- 52 persone ze morti dea fame e, en 1899, ntel bastimento Frisna, 24 persone ze morti sofegai, pestai sora par altri tanti che vignea imuciai.

Ma el pì grando disastro ze stato ntel ano 1906 con el bastimento Sìrio, ma sora questo parlemo nantra ora, parche ze stata cosa bruta! Ma infati, quando gl'imigranti rivea ntel porto brasilian, i se maravigliea con el verdo dea natura i stragnea i omi i done con altro color ( negri), che camignea ntel porto, parche mai visto roba compagna ntel suo paese. Lora, dopo de restar quaranta giorni ( quarentana) ntei staleri del goerno, zeri menai par laorar ntele fasende de café, ndoe raquanti imigranti ga infrentà una vita de schiavi, ben diverso dei relati del paradiso fati per i agenti che i ga persuadesti lassar la Itàlia. Parquesto lora, un numbro massa elevà de imigranti, ga ritornà par la Itàlia o, ndati par i altri paese.

Trá i ani de 1882 fin 1914, ga vignesti rento ntel estato de San Paolo 1.553.000 imigranti, i de questi, 695.000 i ga tornà indrio, o sìpia: pì o manco 45% del totale. Trà quei che ga ritornà par la Itàlia, ga restà ntea lembranssa stòrie tràgiche che fin incoi ze ntea memoria dei fioi, nipoti i anca bisnipoti de quei cha ga ritornà. Però anca ga restà ntele memorie, lembransse de cose bone de quà del Brasile, come dele frute tropicai che mai pì i magnaria ntea vita. Belche quei che i ga restai quà, i ga sconmissià una nuova vita con tuta la fameia, i ga infloenssià ntea formassion de questa nassion en diversi aspècti, giutando cossita ntel svilupamento del paese, ntea banda sossiale i econòmica. 

Par incoi ze questo, stimana che vien parlemo sora la colonisassion qua ntel sud del paese. Soto, una fròtola par rider una scianta. " Lora una olta, Bepi gera drio ndar rento ntel banco insieme con la so suocera ( sogra), quando el ga visto, vignea fora drio corer un ladro che ghenavea pena furta el banco.Vanti de scampar via, el ladro se ferma darente de un omo i domanda: gheto visto qualche cosa quà? Sì, ghe dise el omo; te go visto ciapando i soldi! Lora el ladro daghe una sciopetada i copa el omo!  Lora lu varda el Bepi i dise: i ti, gheto visto qualche cosa? Mi no, dise el Bepi; ma la me suocera quà ga visto tuto!!"... Manco contento ga restà el Bepi, nò?! Strucon di vero cuor i salute par tuti quanti!!!

Ouça e divulgue o programa talian Ricordi d’itália na rádio Sol D’América FM 91.1 todo Domingo das 7 às 9 da manhã.

Comentários