I cossita ghemo fato paesi i cità!!!
Sexta, 16 de Janeiro de 2015

Zemo rivai nantra volta! Come stimana passà, sevitemo anca incoi sora la vita i afari dei nostri antenati ntel Brasile. Con el decorer del tempo, tanto nte cologne come ntele cità, se ga fato veder una diverssificassion dele atività, i parquesto l'italiani scominssian laorar anca co'l comèrssio. Ntel ano 1920, le fàbriche con padroni taliani zeri solche 227 ntel RS, 56 in SC i 61 ntel PR. L'italiani se ga sparamai par tute le regione del RS. I en queste tere, scominssiaro a slevar su le piantasson di ue par dopo farghe el vin. Incói, in queste àrie colonisai par taliani, ga el mèio vin di tuto el paese. I en SC, i contadini vignesti del nord dea Itàlia, se ga stabilisti en so granda maioransa ntel sud del stato. Incói i sui dicindenti fà squasi la metà dea popolassion catarinesse, i se fà notabili traverso dea produssion di grani, vinecoltora, formaio i embutii. El turismo rurale, se fà catar ntei regione di Crissiuma, Urussanga i Orleans, ndove si vede casaroni coloniai vecii i cantine tipiche che ritrata cossì la vita dei primi imigranti. Ntele cologne del sud, l'imigranti ga podesti " imuciarse" su, ndove i podeva cossita parlar la so léngua originale i anca mantegner soa coltura i tradissone. A bon che ga stato la region sud la pionera ntela imigrassion taliana, ze stata la region sudest quela che ga ricevesta la maioransa d'gli migranti. I questo " mistier " se ga dato par che el stato di SP ghenaveva le grande asiende dei cafè.   Alora con el fin dea schiavatura, i con tuto che l'italiane belche feva qua ntel sud del Brasile, el goerno paulista fea di tuto par che l'italiani che zeri ancora ntea Itàlia, lassasse la di vegner par el sud i scominssiassi a ndar ntel sudest par laorar ntei cafesai. I propii paroni dele asiende pagheva el passàio del bastimento par l'italini. Magari dopo questi italiani ghe ocorea far la devolussion di quei soldi con laoro ntei cafesai. Enfati, i primi taliani, en soa maioransa, imigreva par el Brasile in faméia i zeri ciamai di contadini. El goerno brasilian voleva che vegnesse faméie intiere, parché cossita tuti i podeva laorar ntei cafesai: omi, done i anca tosatei. I asendieri, costumai con el laoro fato per schiavi negri, adesso ghe ocoreva costumarsse con i laori paghi, fati per persone bianchi i liberi. Tutavia, raquanti taliani ntele asiende ze stati tratai come schiavi. Questa situassion ga gerà diverse barufe trà l'italiani i asendieri, con  rebelione i revolte. Queste notìssie ga rivà ntea Itàlia, alora dopo de questo, no zera mia fàcile el goerno italiano lassar vegner par el Brasile l'italiani! Sevitemo...! Adesso la fròtola dea stimana. " Alora una olta ga rivà el circo i Bepi una sera di quela ga ndato vardar. Zera la sentà che vardeva, quando el paron del circo ga dito: fao una sfida qua: Guadagna diese mila conti quel che vegner qua far trè cose con el elefante: prima farlo osar, dopo butarsse zo, i dopo farlo parlar. Sùbito el Bepi si bete en pìe i ghe dise: mi fao, ma ghe ocor smorssar la luce! I cossita i ga fato. Dopo di smorssa la luce, el Bepi riva soto el elefante i daghe una bruta strucada ntei colioni. I ga scoltà una bruta sigada! I ga impissà la luce i el elefante zera la che moleva zo le làgrime! Alora el Bepi ghe dise: smorssé la luce nantra olta! La luce se ga smorssa i la ghe vien una bruta peada ntei colioni! Se ga impissà la luce, i zera la el elefante butado zo con le bolete dei oci fora dea testa! Alora el Bepi ghe dise: adesso vao farlo parlar,... smorssé la luce! Smorssé la luce el cul dea nona !..ghe dise el elefante.  


 

Comentários