Gl'italiani ntel Espirito Santo
Segunda, 23 de Março de 2015

Ciao taliani bonìssimi! Incoi parlemo sora gl'italiani ntel stato del Espirito Santo. Ntel ES ghin'è una dele pi grande cologne taliana del Brasile. Gl'imigranti i ga ndati par questo stato par far la ocupassion dela region dela sera. I ze stadi obrigadi a ndar rento ntel bosco vìrgene e sbandonai par el goerno a la pròpia sfortuna! La situassion de pelagra en che viveva tanti contadini, ga fato con che, ntel ano 1895, el goerno italiano no ghe lassasse mia pì i sui citadini vegner par el Brasile. Ntel ES ze stato doperà el medèsimo esémpio de colonisassion del sud, ma sensa i medèsimi resultai. Fin el ano 1891, no imigreva pi de che 200 italiani par ano al stato. Però ntei ani dopo, questo nùmbro ga saltà par 476 italiani en 1892, e 2.406 ntel ano 1893. Dopo con la lìnea del bastimento drita de Génova a Vitòria, ntel ano 1894 ga rivà 3.215 italiani, e pì 4.575 ntel ano 1895.

Con questi imigranti, i ga tentà far la colonisassion dela region del Rio Dolce, ma sensa resultà, parché ga dato un colpo de malatia che i ciamea de còlera ntel sud del stato, che ga fato el goerno tegner par un "bel" tempo l'imbarchi verso a Vitòria, par medo del decreto de 20 de Iulio de 1895. La dificultà dele finanse del stato lo ga fato squasi ndar en malora, e questo ga fato che la imigrassion squasi se finisse ntel ano 1896. Fin el ano 1900, ga vignesti rento ntel stato del ES 43.929 imigranti, de questi, 32.900 zera italiani, o sìpia, 75% del total. Dopo del ano 1900, ciarìssimi italiani i ga ndati rento ntel stato. Darente de 93% de'imigranti italiani, zera vegnudi dele regioni del nord dela Itàlia: 40% del Véneto 8.671 italiani; 20% dela Lombardia 4.392; 14% del Trentino-Alto Adige 3.043; 10% dela Emìlia Romagna 2.282; 5% del Piemonte 1.195; 4% del Friuli-Venezia Giulia 854; 2% del Marche, 2% del Abruzzo, 1% dela Toscana, 1% dela Campánia e 1% de altre regioni.  Qualchedune fontane ghe dise che 60% dela popolassion del ES ze fata par dessendenti d'italiani. Ma questa no la ze una cosa cento par cento s-ceta. Restemo qua incoi! Un strucon de vero cuor e salute a tuti valtri bravìssimi taliani!

Adesso la fròtola dela stimana: Bepi zera la, pacìfico che mai, butà soto l'ombra d'un àlbero nte una banda del trodo( caminho), e la lu ciucea el so sigreto. Nte quela se ga fermà un auto darente lu e ghe vien fora due òmini dela cità. Questi òmini ghe ciapa arquante cose - che par ele Bepi someieva solche potaci- i scomìnsia a mesurar de una banda a laltra del trodo, vanti in drio! Alora dopo de meda ora la solche vardando e sensa capir gnente, el Bepi domanda:  ma se drio far che la tusi con quei trapei in man?. Alora un de quei òmini ghe dise:  noantri semo ingegneri e semo qua drio mesurar questo trodo par far una stradeta par valtri.  Ah ben ben! ....ghe dise el Bepi. Ma noantri qua no femo mia cossita nò!.  Nò?...domanda el ingegnero, belche con una bruta vóia de rider. Ma lora come valtri fe par verder le strade?!   Noantri qua, ghe dise el Bepi; molemo un mul davanti e ndemo dadrio fando el trodo, parché ndove el mul ghe va, ze el meio posto par verder le strade!   Ah...sao mi!... ghe dise el ingegnero belche ridendo dela fàcia del Bepi. Ma e quando no ghin'è mia el mul, feo cossa?!   

Ah ...ghe dise el Bepi. Quando no ghenavemo mia el mul, alora noantri ciamemo l'ingegneri!!   Poareti si, ma bauchi gnanca tanto nò! mia vero?! Ouça e divulgue o programa talian Ricordi d’itália na rádio sol d’américa FM 91.1 todo Domingo das 7 às 9 da manhã.

Comentários