La nostàlgia de sti ani indrio!!!
Quinta, 02 de Abril de 2015

Incoi mi vui parlar una s-cianta sora le cose bone d'sti ani ndrio co mi zera posto ntela cologna insieme con me pupà, me mama e oto fradei e sorele. Go risolvesto parlar sora questo incoi, parché fin che mi zera drio far questa coluneta, el mio telèfono ga ciamà e de quelaltra banda zera la me sorela che diseva che el me pupà zera pena morto! Parquela go tornà indrio e go disfato tuto e scominsià a scriver tuto nantra volta. Co el me pupà a trenta giorni indrio el zera ntel leto del ospedal qua ntel Baril e ancora podeva parlar, mi sentà nt'la so banda, domandeva a lu sora le cose dei nostri noni e, lu con el corpo tuto magagnà ma con la testa ancora sana, me parleva sora le stòrie passade come se le ghenavesse pena avenide. Alora adesso el passà anca me ga vignesto ntela testa e me ga fato tornar in drio ntel tempo e far un vero viaio ntei quei lontani e boni tempi! 

Come mi go dito prima, mi son slevà nte una fameia de ùndese persone: pupà, mama, quatro fioi e sinque fiole, ntela comunità dela Ponte del Pardo, qua ntel Baril. En quei ani noantri no ghenaveino squasi gnente, ma la felicità zera la nostra compagna! Se magneva cossa se ghen'era ntel di: squasi tuti i di ntela colassion dea matima, se beveva el "sià mate" fato con la erba mate, parché cafè no se gaveva mia, massa caro! Insieme se magneva patata dolsa, arosta ntel forno o anca brostulada en rodele sora la siapa del fogon. Anca se magneva un toco de prote, che zera el pan che la mama feva solche con farina de granturco( milio), parché farina de formento zera scarsa par esser massa cara anca quela! O anca se magneva polenta brostulada con i radici coti, insieme con ovi fritoladi e un tocheto de formaio.  Al mesdi se magneva polenta insieme con radici coti, fortaia , gnochi o bigoli, riso e fasoi, pessi ( sardele, barbisoni, gobi i gàmbari) che se ciapeva ntela sangheta darente dea casa e dele olte se magneva anca un tòcio fato de osei che noantri tosati copeva con le fionde o anca se ciapeva ntele tràpole fate de taquare, parché cìcia de galina se lasseva solche par le domeneghe par far el risoto. 

A la note, la mama feva una pignatona piena de minestra o anca una pignatada de un mistier fato de pasta che la mama ciameva de " pastetride", o " pigrìssia de fémena". Ma de questo mistier mi no piaseva tanto no, parché se magneva squasi tute le sere che vegneva fin fora par i òcii! Roba par beter su le zere tute taconai, la mama taconeva su con la gùcia e fil. Ntei pie se meteva le pantofole( sinele), ma solche par ndar ntela ciesa le doméneghe, parché co se resteva a casa o se ndeva ntela scola, se ndeva con i pie en tera. Bicanchi par i pie, solche ntei insogni! Dopo che se feva diese o dódese ani, i tosi guadagnea un pare de conghe e le tose un de sòcoli, ma con due o trè nùmari pi grandi dei pie, par esser doperadi par ani! Dopo pi tardi con la "modernità" rivando fin a noantri mìsiri contadini, alora ghenaveino cognossesto anca le kechute ( chissute) par i tosi e le melisse par le tose. 

Enfati, ze tante cose che se feva e se viveva che la nostàlgia ze granda! Par finir, vui ringrassiar al me pupà par le cose bone che me ga ensegnà e dirlo: VA CON DIO NÉNE DEL DORO !!!...Parchè la vita l'e pròpio cossita...nissuni ghe resta par somensa!!  Ouça e divulgue o programa talian Ricordi d’itália na rádio sol d’américa FM 91.1 todo Domingo das 7 às 9 da manhã.

Comentários