Ponte del Pardo, una comunità fata par taliani!!! Parte 1
Sexta, 24 de Abril de 2015

Ciao bravi taliani, come la vala? Son drio rivar adesso con la bela stòria sora la colonisassion dela lìnea PONTE DEL PARDO qua de Baril. Testo questo che go cavà del bel libro INSOGNI & TRODI e, ghe beto qua con el permesso del paron de questo libro, el nostro bravo storiador WILSON A. FERIGOLLO, lo qual mi vui ringrassiarlo e ralegramentarlo par questo capolaoro! I adesso la stòria. Le tere fèrtile, la acua con abondansa che permeteva la pesca, i boschi pieni de bèstie par far la càcia, tuti questi "mistieri" ze stato la "ciama" che ga depi contriboisto ntela colonisassion dela comunità, parchè cossita vegneva i contadini con sue fameie grande e bisognosi de ara par piantar. El color meso moro dela acua che corseva ntel meso del bosco, ga fato che i betesse el nome de lageà Pardo e, pi tardi i ga acressesto el nome del padronero. Ntel ano 1918 ze rivadi ntel Pardo, persone vegnudi de Passo Grando, Palmeira i de altri posti, par far la colonisassion. Par arquanti, la informassion ze stata che ntel ano 1922, vegnuo de San Luis da casca, Guaporé, ga rivà João Tatto, de nàssita Italiana ntela cità de Beluno. La scoia del nome Pardo par la comunità, se ga dato de forma definita dopo che la Jacomina Tatto, fémena del João Tatto, co zera drio snetar la roba ntele acue del lageà, la ga vedesto una bèstia de color parda che passeva darente ela, alora sensa paura, la ga fracà quela bèstia par le gambe e la ga copada, portando casa par dopo magnarla. Co el suo omo João ga vedesto quela bruta bèstia, amirando el coraio de so fémena, ga osà: cramento!...gheto copà una ónsia parda! Alora dopo de quel avenimento, i ga passà a doperar el nome de Lageà Pardo.

Verso el ano 1928, la fameia Tatto ga costruisto un molin ancora pi grando de quel che belche i ghenaveva. Adesso i ghenaveva un molin no solche par masenar el granturco( mìlio), ma anca par scorsar el riso. Ntel ano 1937, i ga imprimà un molin de pi capacità, betendo anca un dìnamo par gerar la luce fin le case che zera darente del molin e, cossì se ga s-ciarà varii case de quel ceo paese, con la luce gerada ntel molin.                        I primi abitanti del Pardo ze stati: João Tatto, Vicente Faccin, Bernardo Cherobini, Fioravante Bonatto, Vitório Guerra, João da Luz, Angelo Scolari, Vitório Tatto, Roberto Tatto, João Valentini e Alexandre Magri ( mio bisnono). Femo qua anca un ricordo a le fameie Bernardi, Cecatto, Stanga, Silvestri, fra altre tante fameie che ga giutà ntel svilupamento de questa comunità. Sèvita...

Adesso la fròtola:  I me ga ito che una volta, el omo che laoreva con le statìstiche, el riva ntela cologna par far el censo ( me ga dito che ze stato zo ntel Pardo). Alora lu ga rivà ntela casa del Bepi e belche drio sfrugnar ntei cuaderni, domanda a lu quanti fioi ghenaveva. Mi go sie tosi e sìnque tose, ghe dise el Bepi. Cramento !...ghe dise el omo del censo, meso spaurà! Ma gheto una prole granda, nò?! Ma varda...ghe dise el Bepi; granda...granda gnanca tanta,...ma la ze sempre tosta fa un ciodo!!! Ouça e divulgue o programa talian Ricordi d’itália na rádio sol d’américa FM 91.1 todo Domingo das 7 às 9 da manhã.

Comentários