Ponte del Pardo, una comunità fata par taliani!!! Parte 2
Quinta, 30 de Abril de 2015

Incoi sevitemo con el raconto sora la comunità del Pardo. Verso el ano 1928, i abitanti del Pardo i ga fato un capitel in omenaio a San Francesco de Assis. La devossion al santo ga scominsià quando qualchedune fameie, le ga betesto sora nt'una soca de àlbero, la imàgene del santo, ndove la popolassion feva el apuntamento, con sol o con piova, par far la preghiera del terso. La colonisassion, fata in soa maioransa de taliani par compatir dela medèsima religiosità, ga rivà pi darente ancora le fameie par pregar insieme, màssima ntele domeneghe, co’l nùmaro de devoti resteva pi grando, lassando in cimbarli i capi dela comunità ntela costrussion de una ciesa pi granda. Par esser la ciesa darente del fiume Pardo, i ga betesto el nome de San Francesco del Pardo. 

La prima cieseta ghen’era el tamagno de 7x4x3 metri, e ze stata fata ntel ano 1930 ntela banda sanca del fiume Pardo, ma dopo ntel ano1938, ze stata fata una ciesa pi granda ntela banda drita del fiume e che ga servisto anca come scola. La prima messa ze stata celebrata ntel giorno 10 de otobre de 1931 par el prete Valentin Ferrari. Dopo pi tardi, i preti, Vitor batistela, Orestes Trevisan, Luis Sponchiado, Arlindo Rubert, fra altri tanti preti, ga sevità con le messe ogni volta con spesso pi grando. I primi maestri e anca catechisti dela comunità del Pardo, ze stati: Alexandre Magri ( mio bisnono), Fabricio Magri, Afonso Sanvido, Marcelo Sponchiado, Jacó Tatto, Luis Tatto, Angelo Tatto, fra altri che ga verto le porte a quei che voleva imparar leser e scriver, imparando anca l'insegni sora la religiosità. Solche ntel ano 1938, con i abitanti dela comunità ogni volta de pi e anca con pi soldi ntele scarsele, i ga fato una ciesa pi granda, darente de ndove ze la ciesa de incoi. 

El sasso del fondamento l'è stato piantà ntel giorno 28 de Magio de 1967, soto el comando del prete Arlindo Rubert. Ntel ano 1943 ghenaveva 46 fameie e , ntel ano 1970, la scola ga ricevesto el nome de João Tatto, parché l’è stato lu che ga dato el teren par far la scola e anca la ciesa. Ntel ano 1986, i registri diseva che de pi de trè mila aluni ghenaveva passà ntela scola. Le persone pi vècie i ga dito ancora che João Tatto, insieme con sui fradei, i ga fato de legno el primo ponte sora el fiume Pardo. João Tatto ga participa anca dela costrussion dela lìnea telefónica. Quando i ga ndato comprarghe la campana, i ga ndati parlar co’l prete Vitor, ma lu ga dito par nò comprarghe parché zera massa caro. 

Alora Roberto Tatto, che zera el cassero dela ciesa, insieme co’l Alexandre Magri, i ga comprà la campana sensa el prete saver. Dopo de fato el campanário, i ga ciamà el prete Vitor par far la messa par imprimar la campana. Quando el prete ga scoltà la bela sonada che la campana ghenaveva, lu voleva scambiar par due campane dela ciesa de Baril, ma el pòpolo del Pardo no ga mia volesto. Alora, fin adesso la comunità del Ponte del Pardo ga orgóglio de ghenaver la campana con la sonada pi bela de tuta la region!! Dità sapiente: " Un pòpolo sensa memòria, ze un pòpolo sensa radise, sensa stòria!" Ouça e divulgue o programa talian Ricordi d’itália na rádio sol d’américa FM 91.1 todo Domingo das 7 às 9 da manhã.

Comentários