Bastimento Sìrio e l'imigranti che no i ga mai rivadi !...
Sexta, 15 de Maio de 2015

Ècolo!...la stimana la ga passà presta e mi son qua nantra volta! Parlemo incoi sora el naufràgio del bastimento italiano SÌRIO. I viaii dei imigranti ntei bastimenti zera sempre piena de perìcoli; tuto podeva ndar ben, pi o manco o pedo che pedo. Le morte de persone in tuti i viaii zera s-ceta. E no zera ciari i naufràgii. De qualche maniera, i " quarantasei giorni de màchina e vapore", se deventeva in avelimento e paura. El bastimento Sìrio ze stato costruto ntel ano 1883 ntela Escócia, con tuta la modernità de quei ani, con 129 metri de longhessa e 4.141 tonelade; trè mastri, due camini, e con el motor de 5.323 cavai/vapore, e ga fato suo primo viaio ntel giorno 15/06/1883.
Ntel giorno 4 de Augost de 1906, due di dopo dela partensa de Génoa par vegner ntel Brasile, el bastimento italiano Sìrio ga naofragà ntele coste dela Spagna, darente dele ìsole Formica insieme al mànego Palos con 1.700 passageri e 127 tripolanti,( 400 persone de pi de soa capacità), fra lo quale 700 imigranti italiani che vegnevano al Brasile. Zera le sédese ore dopo mesdì; la nave ndeva a una velocità de 17 nodi ( 31,5 km/h), ben sora par quel posto che zera darente dei sassi, e el capitano Giuseppe Piconne de 68 ani, ga lassà el comando par el terso ofissial, quando se ga scoltà un gran ciasso soto la nave, spaurando a tuti. Ancora no se sà parché el bastimento se ga sfondà in pochi minuti. Dei 700 italiani, 300 i ze morti ntea ora e 200 ze restai sparidi par sempre.
La nave spagnola " gióvane Mighel", ga racolto darente de 300 nàufraghi, però ga buo de alontanarse, lassando indrio ancora centene de persone vive sora l'aqua, parché le " sciochi" dele caldere del Sìrio e el suo presto sfondamento, ga metesto in perìcolo la vita dei soravivanti, mentre el bastimento francese "Marie Louise", che zera lontano, co ga rivà al posto ndove el Sìrio se ga "rabaltà", belche no ghenaveva pi gnente da far.
El capitano del "Sìrio" ze stato el primo che ga sbandonà la nave, lassando indrio centene de passagieri che, desesperai, salteva rento el mar. Dopo i ga fracà questo capitano e metesto in galera, parchè, oltre de esser un codardo par lassar indrio le persone sensa aiuto, stata soa la colpa del naufràgio, parché volendo ciapar de pi soldi, costumeva meter rento ntel bastimento imigranti clandestini ntele coste dela Spagna, parquela ga rivà co'l bastimento massa darente dei " sassoni", aponto par ciapar pi passagieri, che ga "sbregà' la nave par soto. Fra i passageri morti, zera el José Camargo de Barros, véscovo de San Paolo, con 48 ani. Testemònie i ga dito che el véscovo ze morto quando ntela ora del " babel", mentre lu benedissia le persone che se trea rento el mar, un omo ga rivà e ga dato una fila de bote ntel vésco, par dopo ciapar el gilè salva vita che lu ghenaveva ntel corpo. E dopo ancora ze stato pestà par el visibìlio che no saveva cossa far par scampar del disastro! E ze stato pròpio cossita che se ga deventà con el bastimento Sìrio, ndove ga copà centene de persone ! Strucon e fin stimana che vien!
Ouça e divulgue o programa talian Ricordi d’itália na rádio sol d’américa FM 91.1 todo Domingo das 7 às 9 da manhã.

Comentários