La fadigosa però bona vita d'sti ani indrio co se godeva par gnente!!
Sexta, 22 de Maio de 2015

Ze belche vendre nantra volta e parquela semo qua anca noantri! Incoi parlaremo sora le cose bone d'sti ani indrio, de co zèrino cei posti in colónia, del tempo che i giorni no passeva mia, someieva fin che zera fati de quarantaoto ore. Ricordo che noantri tosatei, medésimo ghenavendo sìe, sete ani, se alseva bonora a la matina, parché ghe ocoreva giutar ntel lavoro. La prima cosa a far pena desmissiadi, zera far la colassion che la mama parecieva par noantri. Par bever gaveino el té ( sià mate), fato de erba mate, parché el cafè zera solche par i siori ( richi). Par magnar a la matina, la mama feva: fortaia, polenta brostulada, radicii coti e el “prote”( pan fato solo con farina de granturco) co’l melasso, parché farina de formento zera massa cara par noantri poareti. Dopo de magnar, la mama parecieva rento nte una scudela, la colassion del pupà, che zera belche lavorando su ntela riva.
Oltre del magnar, la mama meteva el sià mate rento nte una botìlia de viero, par noantri tosatei lo menar insieme co’l magnar al pupà. Ricordo che una matina de quela, mi ndeva su ntela riva menando la colassion par me pupà, nt’quela go sbrissià le pantòfole ( sinele) ntel sguasso- che zera tanto in quela matina-, alora co’l rabalton che go ciapà, la botìlia se ga spacà sora un sasson e se ga spandesto tuto el sià mate. Con paura de rivar fin el pupà sensa el sià, go tornà indrio casa par torghe nantra botìlia, ma el sià zera finio e la mama me fa ndar su par la riva solche co’l magnar ntela scudela infagotada nt’una tovaia - che in quele ore zera belche tuto fredo-. Co go rivà ndove el pupà l’era drio sapar, zera squasi le ùndese e, no ghe ocor gnanca dirlo che’l pupà zera belche rabioso e medo “verdo” de fame. Solche no me ga molà, parché go dito cossa se gaveva adeventà ntel rabalton. E cossì in quel giorno, el pupà ga fato la colassion insieme co’l pranzo del mesdì.
El lavoro che noantri tosati ghenaveva par far, zera squasi el medésimo lavoro dei grandi: sapar la rampeghina in meso i fasoi, el mìlio, la soia, el tabaco; taiar le scapoere; piantar mandolini, patate, mandioche; catar e menar casa magnar par i porsei ( porchi); menar e ligar le bèstiame ndove ghenaveva el meio “verdo” par magnar; scartossar e sgranar le panòcie soto la cantina, par dopo menar el granturco al molin par far la farina, e cossì via.
Par schersar, se ghenaveva tanta cosa da far, come: Giugar la pala ( bola), giugar la viera (bolita), copar oseleti con la fionda, far le tràpole par ciapar i osei, bever bagno ntele sanghete, ciapar co’i lambi le sardele, barbison, gobi e fin gambari, schersar de ciapa ciapa, de sconto sconto, far filò insieme a i pupà, e tante altre cose bone de quei ani, che se fusse meter qua, ghe ocoreva trè foie de questo sfóio. Enfati, la vita zera sémplice, però noantri se godeva come se fusseno fioi de rè e regina! Che nostàlgia de quei ani!!!
Lasso i ralegramenti al coral italiano UNICANTO qua de Baril, che con la cansion Tornerò, ga ciapà el primo posto ntel XIII fest’itália a Palma sola SC, ntei giorni 01 e 02 de Màgio.
Ouça e divulgue o programa talian Ricordi d’itália na rádio Sol D’América FM 91.1 todo Domingo das 7 às 9 da manhã.

Comentários