Nostalgia d'sti ani indrio in che se guadagneva manco, ma se godeva de pì!
Sexta, 05 de Junho de 2015

Ècolo !...nantra stimana se ga ndato via, e presto anca!... porca méscola! Del bon, i ani se svanisse pròpio pi presto, ma no parché i giorni se ga restai pi picoli, ma si parché i pensieri, la tribolassion che ghenemo sora le cose che ghe ocor far, no ne lassa veder le ore "scampando"via fra i nostri dei. Sti'ani indrio no se ghenaveva e gnanca se ocoreva far tanta cosa par soraviver come se ghe ocor far incoi, parquela che le ore custeva ndar via e cossita se svanseva tempo par parlar de pi con le persone, par catar de pi i vissini ntei filò. E incoi, chi che se cata rento casa? Gnanca pi i pupà co'i fioi se cata mia! Una olta dopo finido el laoro del di, se vegneva tuti rento a casa a sera e ntela ora de magnar tuti zera insieme ntela tola, parlando e schersando un con quel altro. E incoi come ze? La mama in cosina pareciando el magnar, el pupà vardando el giornal e i fioi ntel computer, ntel celulari, ntei giugheti, o anca se pi vècii, ndando via studiar a la sera. Incoi quanto pi soldi se fà, pi se scampa via, parché quante spese se ga: l'acua, la luce, el telèfono, la intranet, el petròio par el auto, el gas par el fogon, la television par abonamento, i corsi par i fioi o la scola, el afito ( par quei che no ghin'è casa), el magnar ntel mercà ( ogni olta de pi), i imposti par el goerno( che no ze mia pochi) e cossì via .
Una olta i soldi zera scarsi ntele scarsele, ma zera scarsi anca i posti par guastarli. Una olta no se pagheva mia l'acua par bever, la vegneva drito dela fontana in medo el bosco e riveva sensa color e nò bianca come riva incoi ntela spina! La luce del " ciareto" zera solche beter rento la cherosena; telèfono no se saveva gnanca cossa zera, e questa "net" lora, gnanca ntel insògni se magineva quel mistier; no ghe ocoreva mia el petròio, parché el caval feva diese chilomitri solche con una panòcia. Par el fogon o anca el fogolaro, se ciapeva sensa pagar gnente el legno rento ntele scapoere; television no se ghenaveva; la scola par i fioi no se pagheva mia. Se zera de star rento nte una caseta fata de taole e cuerta de scàndole, ma no se pagheva afito. El magnar se compreva solche quel che no se podeva piantar o slevar casa e, parquela se pagheva manco imposti in quei tempi, difarente de adesso che el toco pi grando del guadagno ghe va par el ladro del goerno!
Enfati, sora questo ghenavemo tanto par parlar che lassemo par sevitar nantro di. Ma vanti de finir vui qua dir che, medésimo con tuta la dificoltà che ghenavemo, noantri ocoremo imparar nantra olta a vivar la vita!
Adesso frotolemo: Zera la el prete fando la preghiera ntela messa e un ciuco la medo sentà, medo butà ntel banco. Nte quela tuti torna la testa indrio par vardar una dona che vegneva rento a ciesa squasi sensa roba, con una bluseta corta inbotonada da vanti, con due peti grandi, sgionfi che pareva fin la Ciciolina! Nte quela se ga verto i botoni e un peto ( i che peto) ga vignesto fora. Alora el prete pi che sguelto ghe dise: quel che vardar quel mistier ghe resta orbo! Alora el ciuco che no zera bauco, ghe dise: ma mi vao ris-ciar al manco un òcio!! CURSO DE TALIAN: Se você está interessado(a) em aprender a falar melhor nossa língua taliana, também lê-la e escrevê-la, então entre em contato comigo através do meu e-mail. Ouça e divulgue o programa talian Ricordi d’itália na rádio sol d’américa FM 91.1 todo Domingo das 7 às 9 da manhã.

Comentários