Ze belche ora de far qualcossa par giutar svilupar la léngoa talian!!!
Sexta, 19 de Junho de 2015

Ben, ben taliani,... semo rivai nantra volta e, insieme a noantri ga rivà anca el fredo! Òspia, zera belche ora nò?! Parché romai semo ntela metà del an, mese del fredo! No sò mia a valtri, ma a mi el fredo ghe porta insieme una serta nostalgia dei ani in che la fameia se "imucieva" tuta in torno del fogon, o dele volte, del fogolaro; par scaldarse, magnar pignoi brostulai sora la siapa, mandolini, patate dolse, e scoltar el pupà e la mama parlar sora la vita dei nostri noni, e tuto ntela léngoa talian. Savemo che i ani no i torna pi indrio par noantri viver nantra volta quele bone cose, ma par laltra banda, savemo che se volemo, ancora semo boni de torghe serte cose de una volta par métele ntela nostra vita, come tornar a parlar de pi el talian! Tanti "taliani" i dise che la léngoa taliana ze drio morir! 

Chissà par questi si la pol esser morta belche, parché i varda solche intorno del so bunìgolo, ma par quei che ze drio far qualcossa, el talian ze ogni olta pi vivo, pi parlà! Adesso mi domando a ti che gheto la fémena o el omo talian: parché no parlé mia fra valtri ntela léngoa taliana e cossita insegnar anca ai fioi? Si drio spetar che? Morir par dopo far qualcossa? Nò cari da Dio!  Proé far qualcossa adesso,... incoi! Quando caté el nono o la nona, proé parlar con lori ntel talian e vedé i so òcii slusindo de contentessa! Par fin che i ghe resta pi vivi, pi valorisai! Savemo che dopo de tanti ani sensa parlar el talian, se fà un gropo ntela léngoa, ma sevité parlando fin sderfar questo gropo, quando nde incòrzerse, si drio parlar polito la léngoa dei nostri noni, el nostro talian. Ntela vita de tanti casai, se ga alsà belche un ritégno ( barreira), i fra lori no’i ghe parla pi, no'i ghe parla pi gnanca co'i fioi, parquela che la fameia la ze drio sderfarse! Ntela fameia che ga la mancansa de parole, ga la bondansa de barufe e, sicuramente questa no ze mia la voluntà de Dio! Parquesto invito a tuti par vardar indrio, veder ndove ghenavemo sbalià e scomìnsiar a far come se feva una volta, quando se parleva de pi. E par scomìnsiar, gnente meio de che tornar a parlar nantra volta el talian! 

Adesso la fròtola:  Toni ga fato un viaio fin la tera santa par cognosser i posti ndove Gesù ga stato a pi de due mila ani indrio. Pena rivà, el ga volesto cognosser el mar ndove Gesù ga caminà sora l’aqua. Cossì el ga domandà par un omo menarlo con la barcheta rento al mar. Dopo co i ga tornà indrio, Toni domanda quanto fiorini ghe tocheva pagar. 200 conti,.. ghe dise el omo! Che?!.. 200 conti?!.. sito mato?! Ti te cati che mi go una pianta de soldi?! Ma varda,...ghe dise el omo; no sta mia smentegarte che ze stato qua che Gesù ga caminà sora l’aqua! Si, si...ghe dise Toni,...ma con quei pressi qua, chi che no caminea?!

Interessados em fazer o curso do talian véneto brasilian, entre em contato pelo meu e-mail.

Ouça e divulgue o programa Ricordi d’itália, todo Domingo, das 7 às 9:30 da manhã, na rádio Sol d’américa 91.1 FM.

 

Comentários