Brasile, ...grando, bel...e mal ciapà!!!
Sexta, 03 de Julho de 2015

Taliani, savemo che el nostro paese ze drio traversar par una bruta situassion, che feva belche "ore" che no se vedeva roba compagna! Mai visto tanti ladri ntel goerno! Ma ghin'è tanti politichi ladri, che nissun de lori vol pi menar insieme el portafoio( cartera) ntel lavoro, con paura de esser ciavado par suo compagno de profission! Ma no ze mia sol par tuti i ladri che ghin'è ntel goerno che el nostro paese ze drio ndar in malora. Se fusse sol parquesto, basteva méterli tuti in presion e la saria finida! Ma insieme con tuta la mànega de gatuni, gavemo anca la mala aministrassion de un goerno fiaco che cata esser paron del nostro paese! Cata che par esser ntel poter a arquanti ani, ghe pol far cossa ghe vien ntela testa! E cossita el ghe fa lege ogni olta pedo par la magioransa dea popolassion. E cossa dir sora l'imposti? tuti i di ghe vien fora un difarente! Poari dei paroni che no sa pì cossa far par mantegner le porte verte, parché l'imposti i ze drio magnar par "una gamba"! I ndove ghe va tuta questa mùcia de soldi che noantri brasiliani no ghe vedemo mia?! ! Parché i soldi dei nostri imposti ghe va par el goerno de scaretade piene e torna indrio rento d'un cuciaro?! Parché i ghe va in su come un vero fiume de soldi e ghe vien in zo solche in gosse?! Parché ghe toca a noantri pagar due volte la conta fata par un goerno sensa giudìssio e sensa capacità?! E quando el goerno parla sora taiar le spese, ze parché ze drio taiar le verbe che ze destinà al pòpolo, ma el stipéndio( salàrio) dei politichi, ogni olta resta pi grando! Parché ghe ocor tanti deputadi e tuti guadagnando una mùcia de soldi par mese?! Oltre dela giuta che i ghen'è traverso quela che i ciama de "diària"- e ghe ocor qua dirlo che la"diària" de un polìtico, ze compagno el ano de lavoro del poaro lavorador brasilian - i ga ancora tuti i mesi la giuta par el afito, par la fatiota, par la salute, par rangiar i denti, giuta par i viaii, par reviste e giornai, par el petròio del so auto, par el telèfono e tante altre giute che me fa fin schifo ricordar qua, e ancora i " lavora" diese mese i receve quìndese salàrii par ano! E ancora cossì, la magioransa i ze ladri! I ancora cossì tuti i ani de elession noantri ghe metemo là i medésimi! I ancora cossì no femo gnente par difender i nostri diriti, mia vero?! No caté mia valtri che ga svansà belche la ora de far qualcossa par no veder el nostro Brasile come un gàmbaro, ndando indrio?! El pedo ze che savemo cossa far e quando far, ma no savemo come far, parché ne ghe manca coraio!! Ma vardemo indrio la vita dei nostri noni, che solche co'l coraio e voia de laorar, i ga svilupà questo paese, e se semo rivai qua incoi, ze gràssia al lavoro de lori! Alora, ciapemo la soo vita de coraio par spècio e femo compagno, vanti che la sìpia tarde de pì!!!
Adesso la fròtola: La mama domanda par so fiol: Pierin, cossa vuto esser dopo grando? Mi vui esser polìtico mama! Ma parché vuto esser polìtico Pierin? Parché mi mai visto un polìtico fando manifestassion par un meio salàrio, mama!!
Curso da língua taliana vêneta brasiliana. Interessados, entrar em contato pelo meu e-mail.

Comentários