Piova,...sassi e brentana!...de chi che ze la colpa??
Sexta, 24 de Julho de 2015

Orco can,...quanta piova in questi di! Se sevitar a piover cossì, sicuramente se adeventemo in rospi, mia vero?! El pedo l'è che insieme co'a piova, ghe vien anca i sassi e la tempesta e parquela in tante cità, arquante casa ga buo el coerto sbuso o anca trati via co'l stravento! E quele case che ze darente ai fiumi, se ga restai piene de aqua; un vero disastro par tanta giente! Enfati, la natura la ze cossita pròpio, sempre la ga fato del'e sue e no ze mia solche adesso nò! Ma del'e volte ti te poi dir: ma una volta no se vedeva mia i fiumi vegner rento a casa come se vede incoi! E mi te digo: parché una volta, nissun feva le case tanto darente dei fiumi come se fa ntei giorni de incoi, una volta se respeteva pi! E se la natura la ze drio far arquante de pi incoi, no ze mia par colpa de Dio come tanti ghe dise! Ma si ze parché noantri semo drio destrudirla pianpianeto, e "fando del'e sue", ze la ùnica maniera che ela ga catà par dirlo qualcossa par noantri! Spetemo che la umanità vegne a capir el recaio che la natura la ze drio mandarghe al mondo, vanti che la sìpia tardi de pi!
Ma lassando le magagne d'una banda; tuta questa piova me fa ricordar dei ani de pìcolo co mi laoreva nte'a cologna insieme co la fameia. Me ricordo che quando pioveva, un di dopo el pupà diseva: fioi, ciapé la sapa e ndé sapar in medo la soia. Ma pupà, ga pena piovesto e ze tuto moio ancora! E lu diseva: ze moio qua soto nte'l piano, ma la su ntea riva se ga sugà belche! E pedo che zera pròpio cossì, el pupà ghenaveva reson, parché su ntei monti la aqua no se ferma mia e parquela se suga presto e se pol sapar polito. Ze parquela che ai taliani s'ti ani indrio le piaseva de pi la riva che i tochi piani, parché cossita pena dopo la piova, no ghe ocoreva mia spetar fin una stimana par sugarse la tera par dopo lavorar! Parquesto sicuramente polemo dir qua che: quei che gaveva so tera fati de monti, gaveva pi voia de laorar, e quei co la tera piana, zera persone piene de gnàgnara ( pigrìssia)! E ti co te laoreva o anca te laora nte'a cologna; come zera o ze la to tera? Piena de rive ( monti), o la ze piana come una tola?! Òcio là co che va dirlo! No go ocor mia busiar, vito!
Adesso la fròtola: Bepi feva un viaio de vacanse con la fameia e la so sòcera ( sogra) insieme, co un guardia lo ga fermà e ga ito: qua ze permesso ndar a 90 par ora, e ti te zera in 130! Ti te si sbalià, ghe dise el Bepi, mi vigneva solche a 80! La so sòcera nte'l banco dadrio ghe dise: 80? ti te vigneva de pi de 140 ! El guàrdia ghe dise: e la luce de'a banda drita la ze sbrusada! Ma sol se la se ga sbrusà pena adesso, parché mi no saveva mia! E la bissa del banco dadrio: Come no saveva mia, se fa belche due mesi che te scolto dir che ghe ocorea rangiarla! E el guàrdia sèvita: e oltre de questo tuto, ti te zera sensa el sinto de sicuressa. Va la, va la..ghe dise el Bepi; mi lo go cavà par ciapar i documenti! E la bissa dadrio: che ciapar i documenti Bepi! Mi mai visto ti beter el sinto! E el Bepi rabioso come un can ghe dise: cagna putana!... vècia sparlaciona,..bissa piena de velen!...mi te copo co rivemo casa!! Alora el guàrdia domanda par la vécia: lu ghe parla sempre cossì con vu? Nò, nò,..ghe dise la vècia; lu ze un bon omo, ma quando el beve, ghe resta cativo questo ciucheton!!

Comentários