El miel ze dolso,...ma le brespe ghe beca!!!
Sexta, 28 de Agosto de 2015

Alora ciò taliani!...come la vala?! Dopo de quatro colone parlando sora la difarensa fra el talian del italiano, incoi parlaremo sora nantra cosa. Zera qua mi pensando co'i mi botoni sora cossa parlar incoi, co ga vignesto in testa el ricordo de cossa ga sucedesto una volta, co mi zera ancora ceo posto in cologna. Gnanca ghe ocor dirlo qua, che in quei ani no gaveva mia la modernità d' incoi, parquela noantri tosati se godeva con tuto che vigneva davanti de'i òcii! Zera un bel giorno dopo mesdì, e noantri tosatei giocheva tuti insieme. N'te quela, el me fradel pi gióveno, insieme co'l fiol del vissin, con la medèsima età, i ga risolvesto trar zo un gnaro de matutini ( brespe negre e cative che feva i so nidi ntele falde d'le case). Come el gnaro de queste brespe zera picà nt'un posto pi alto d'la falda de'a casa, i due imbambidii se ga combinai de ndar rento nt'la càmera del leto e co'l mànego de'a scoa, traverso la finestra, sponciar el gnaro fin che'l cascheva zo in tera par dopo ciuciar el miel. E cossita i ga fato. Ma prima, par no esser becai par le brespe cative, i ga ciapai due careghe e le ga meteste butade una sora laltra nte'a porta de'a càmera, parché i cateva che cossì, le brespe no podeva mia ciaparli de quelaltra banda dopo che i due salteva sora le careghe par scampar dei matutini! Alora co'l mànego dea scoa, i ga sponcià el gnaro - e no ghe ocor qua gnanca dirlo el tanto de cativèria che le brespe ze restade-, parché pi de cento ave mate de ràbia, i ga metesto i due par corer. Ma par scampar d'le brespe e ndar via d'la càmera, ghe ocoreva a lori, prima passarghe sora le due careghe butade nt'a porta, e ze stato questo el pedo, parché i ga ciapà un bruto rabalton sora le careghe e no'i ga fato ora scampar! Alora magineve solche quante becade de ave i ga ciapadi quei due sfortunai tananai! El me fradel, solche nt'la testa, ga ciapà vinteuna becada, e tante altre par el corpo! No'l ze morto par un miràcolo! Mi che no zera mia tanto coion cossita, go restà solche vardando de lontan. Cossì no go mia ciapà becade d'le brespe, ma dopo go ciapà arquante sbachetade d'la mama, parché go lassà i due tosati pi ciei "sfrugnar" nt'l gnaro de'i matutini! No sò mia se no zera meio le becade d'le ave, che la bacheta de pèrsego d'la mama! Ze come dise el sapiente dir: "la sìmia che se grata, ze parché la vol balini!"
La fròtola: Ntel tramonto la fémena ntel tanche osa: -Vècio!!...veto doperarme sta sera? - Nò !..ghe dise el omo. - La vècia ghe dise: Alora vao lavarme solche i pie!!
Ouça e divulgue, ricordi d'itàlia, todo Domingo, das 7 às 9:30 da manhã, na 91.1 FM.

Comentários