Ma che bruta ciavada che ne'a ga petada a noantri brasiliani!!
Sexta, 04 de Setembro de 2015

Ricordeve che'a solche un fià de giorni indrio, pareva che el nostro paese zera tuto una maraveia?! El goerno ne feva creder che el paese zera ntel trodo s-cieto, che adesso si noantri brasiliani ndeva veder "con quanti legni se feva una canàgola"! Pareva che el paese zera come un bastimento drio far la navegassion ntele aque calme, pacìfiche! Vanti le elession, ntele parole del goerno, la inflassion no zera e gnanca tornaria a intrigar el pòpolo! Che i ladri ntel goerno zera drio finirse! Che mai ntela stòria de questo paese, se ga fato tanto par giutar el pòpolo! El goerno diseva che gaveva fato quel e anca questo! Ma dopo che noantri gavemo eleto i medèsimi, le parole del goerno se ga cambià dela note par el di! Belche no zèrimo mia ntel trodo s-cieto, parquela ocoreva al goerno far cose che no piaseria al pòpolo! E cossì la inflassion ga tornà, e someia fin che ga bevesto anabolisanti, de tanta granda che se ga adeventà! El "bastimento" che naveghea in aque calme, se ga fato compagno el Titaniche, o compagno el Sìrio; se ga sfondà dopo de sbregarse su ntel giasso o sassi sconti soto l'aqua! Enfati, no ghe ocor qua parlar de tuti i guai che noantri brasiliani semo drio patir e gnanca parlar de tuti i soldi che i politichi ze drio rubar de noantri! Se ga un àtimo par se gaver vergogna de esser brasiliani, el àtimo ze adesso! Fa fin pecà veder un paese grando, bel e sior come el Brasile, esser "ciavado" cossita par persone che noantri gavemo confidà e metesti ntel goerno! E no caté voaltri che ze solche in Brasilia che i ze drio rubar, nò! Proa darghe una vardada ntei sìndachi (prefeti) e anca ntei conselieri comunal (veriadori) dela maioransa dei contea (munissìpii)! Ze de spaurarse de tante cose brute che i ze drio far co'i nostri soldi! Me ricordo d'sti ani indrio co se ciapeva una bruta ciavada, i nostri taliani ghe parleva: "me'a ga petada anca questa"! Se i nostri taliani ghe parleva cossita par qualche coseta, magineve incoi alora cossa noantri brasiliani dovemo dir! Dir che semo mal ciapai, ze poco! Parché la verità ze che semo tuti ben ciavai!!... questo par no dir nantra cosa che mi lo sò che gheto pensà adesso! Parquela, sensa paura de sbaliar, podemo si dir che: questa i ne a ga petada sensa pietà... e anca sensa spuàcio!! Mia vero?!
Adesso el pensiero del di: Se sito nassesto poareto(a) e vuto adeventarse sior (rico), ghin'è solche trè cose par far: ciapar ntela loto, maridarse co na persona siora, o alora adeventarse polìtico!

Ouça e divulgue o programa Ricordi D'itália, todo domingo, das 7 às 9h30 da manhã na 91.1 FM

Comentários