Ndove ze i nostri taliani che no se scolta pì?!
Sexta, 18 de Setembro de 2015

Son qua un tanto intrigà con la nostra giente, che torno a domandar: ndove ze sconti i taliani che no se scolta squasi nissun pi parlando la nostra léngoa?! Ndove ga sbalià i nostri noni che'i so fioi no'i ze stati boni imparar el talian?! E cossa ga fato i nostri pupà che no'i ga mia "desmissià" i nostri noni par insegnar a lori parlar questa bela léngoa?! E se i nostri pupà no'i ga mia imparado, adesso come femo par insegnar i nipoti parlar?! E se no insegnemo a'i gióvani adesso la nostra léngoa, doman o dopo, chi che va mantegner viva la nostra identità?! O no savé voaltri che la identità d'un pòpolo solche se mantegne viva traverso la léngoa parlada?! O caté voaltri che esser talian ze solche far i apuntamenti (incontri) par magnar e cantar la verginela, la amèrica, o fursi la bela polenta?! Pensé qua con mi: in questi apuntamenti de quei che se cata taliani, cossa se impara par mantegner la tradission?! No son mia contra quei che ghe piase magnar e anca sonar le cose de'i nostri antenati, nò, parché questo ze una bona cosa par farse e me piase anca a mi. Ma tosi... no ze fando solche questo che ndemo mantegner le nostre radise, la vita de'i nostri antenati! Se pénsito ti che basta far queste cose par esser talian e portar avanti le tradission, alora gheto comesso un grando sbàlio! Parché la ùnica maniera de menar avanti la nostra cultura, ze insegnando la léngoa taliana par i nostri fioi, i nostri nipoti, enfati, par i nostri gióvani. Proé insegnar a'i tosati sìnque o sìe parole a'l giorno e vedé che dopo de due o tre ani i ze drio parlar polito el nostro talian, parché i tosati d'incoi no'i ze mia imbambidii come noantri zèrino una volta!

Ntei giorni d'incoi le persone ghe piase imparar una mùcia de cose: i ze drio imparar a sonar, cantar, pintorir e anca a parlar el inglese, el spagnol, el francese, el tedesco e fin el italiano (toscano). Alora mi domando: parché che no'i ghe va mia adrio par imparar el nostro talian (el véneto brasilian)?! Cavando via el inglese e chissà el spagnol, qual ze el vantaio de parlar altre léngoe?! Torno qua a dir: imparar parlar raquanti léngoe, ze robe bone de se far, sensa dùbio! Ma ciò...! Alora parché no imparar el nostro talian che ze la léngoa dei nostri noni?? Che ze la seconda léngoa pi parlada qua a Brasile (adrio solche del portoghese)! Che ze una d'le léngoe pi vècie del mondo ancora parlada! Che ze una léngoa parlada in diverse paese!!! Invito a ti par pensarghe sora questo, e se vuto saver de pi sora el talian, o anca far un corso par imparar parlar meio e anca leder e scriver el nostro talian, ze solche parlar con mi traverso el mio email che ze la su ntela banda drita del mio ritrato. Strucon e fin stimana che vien!!!

Gostaria de fazer o curso de talian? Então entre em contato comigo pelo meu e-mail.

Ouça e divulgue: Ricordi D'itàlia, aos Domingos, das 7h00 às 9h30 da manhã na 91.1 FM

Comentários