La graspa...la ua...i òchi... e una bona storieta!!!
Sexta, 06 de Novembro de 2015

Ècolo taliani...! Semo tornadi indrio nantra volta. Incoi mi vao beter qua una storieta. Se ze vera o nò, mi no sò dirve. Tuto che sò, ze che la go scoltada del brau talian Edegar Locatelli Maròstica, lu che ze posto ntel'a cità de Serafina Correa, sensa dùbio, la cità piu taliana del Brasile. Enfati, ndemo a storieta del Maròstica. Voaltri savé che ai taliani ghe piase una bona caciasseta, no ghe ocor gnanca dirlo qua. E sti ani indrio no zera difarente, i taliani ghe feva de tuto par ghenaver casa una bona caciassa. E nò contenti solche con la caciassa, co se riveva la stagion del'a ua, dopo pena fato el vin, se ciapeva le scorse del'a ua par far la graspa. E voaltri savé che la graspa nol'a ze mia fàcile pararla zo sola, parquela i taliani costumeva "consiarla" con boticave, butià, ua e fin bonmaistro, cossì se resteva pi "manseta" par béverla. E co se finia la graspa, se trea fora le cose che zera rento. E l'è stato cossì che ze vignesta fora questa storieta: una volta, dopo finida la graspa "consiada" co'i grani de ua, la fémena del Toni, ghe ciapa pena dopo mesdì e buta fora par la finestra questi grani de ua, ancora imbombadi co'l spìrito de'a graspa. E noantri savemo che in cologna, tuto che se tra fora ntel cortivo, le bestiolete ghe magna. E in questa casa ghen'era oltra del'e galine, anca i òchi, parché i òchi, oltra esser compagni i can par badar la casa, ancora i deva le pene par far i cossini, le straponte, le imbotie, el piumin, i paioni e cossì via. E l'è stati questi òchi che ga magnà tuta la ua imbombada co'l spìrito de'a graspa. Ben, ben... dopo de far el lavoro rento casa, la fémena de Toni ga ndato lavarse su la roba ntel riet darente casa, parché una volta nissun ghen'era el tanche rento casa; se meteva el lavel nte'la sangheta e zera là che se laveva la roba. Co zera belche drio vegner el tramonto, la dona torna indrio de'a sangheta e cata ntel cortivo i òchi tuti butai come morti. Ela credendo che i zera morti, bete la man nte'a testa spaurada e scomìnsia a vardarli par veder se i gaveva qualche malatia. La ga pensà: dele volte ga dato el schiton o furse el tifo. La ga vardà e no ga mia vedesto gnente. Alora ga dito: par no pèrderli sensa aprofitar gnente, mi ghe cavo via le pene par dopo doperarle ntel'e cose del leto. E cossì ga fato, ciapa una cavagna granda e scomìnsia a cavar via le pene d'sti òchi fin assarli pelai. Dopo i ga trati zo rento ntel'a sangheta. Co riva la note, vegne rento Toni e ela ghe conta sora i òchi. El omo ghe dise: ben, ben, femo che,...adesso i ze morti! Co riva laltro di, bonora a matina, se senti i òchi: quèc... quèc... quèc..., lori i ghe varda par la finestra e vede che i òchi i ze drio vegner su del'a sangheta, tuti pelai, uno drio quelaltro. Alora el omo domanda par la fémena: Gheto fato che gieri? Fato gnente...! go solche trato via la ua che zera rento ntel'a graspa e i òchi i ga magnai. Ma lora vècia bauca...! No gheto mia vedesto che no'i zera morti?...?! I zera solchi ciuchi!!

Ouça e divulgue: Ricordi d'itália, aos Domingos, das 7 às 9h30, na Sol d'América FM 91.1

Comentários