El filò se ga ndato... e se ga portà insieme la nostra felicità !!!
Sexta, 20 de Novembro de 2015

Porca frégola... Se ga ndato nantra setimana e noantri semo qua nantra volta! Incoi ndemo far un ricordo d'sti ani indrio, quando se viveva de una maniera sèmplice, però massa felice. Me ricordo quando mi zera ancora un tosatel de sie, sete ani, insieme con me fameia de undese persone, posti in cologna. Sensa tante cose par far par goderse, dopo finio el lavoro in cologna e pena fato el tramonto, tuti ndeva casa par far i altri lavori, come: daghe acua e magnar par le bestiame, par i porsei, galine, òchi e cossì via. Dopo se ndeva nte'a sangheta par lavarse su e presto tornar indrio, parché squasi tute le note se ndeva a spàssio ntei vissini a far el filò. In quei ani in cologna no se gaveva mia la television, fursi un radieto a pìlia, parché la luce ancora no gaveva rivà. Cossì, sol resteva el filò par goderse insieme co'i amici e vissini. E ghe ocor qua dir, "santo filò", parché traverso lu, i lassi de amicìssia se streteva ogni olta de pi fra i vissini i amici. La sera, tuti ndeva contenti par el trodo cantando la verginela, mèrica mèrica, massolin de fior e tante altre sonade taliane, che lasseva i pupà orgoliosi in veder come i cei impareva cantar le cansionete dei nostri antenati. El pupà ndeva davanti portando el ciareto in man e el fiol pi ceo ntei brassi. La mama meneva la galina pi grassa che gaveva ntel punaro, par far el brodo ntel filò. Quando se riveva nte'a casa, la alegressa l'era granda! I grandi ndeva rento par far i giughi de'a brìscola, tresiete e tanti altri. Le done ndeva in cosina par pareciar el brodo e anca el risoto. E noantri tosati, tosate, tosatei e tosatele, resteva fora ntel cortivo par giocar e dele volte, quei che'i zera un fià pi vecii, proeva morosar strucando i òcii par le tose, o ciapando nte'a man, parché basar, gnanca se saveva cossa zera quei "mistieri"! Ghe ocor qua dir che, quando se cateva due fameie insieme, se feva una mùcia de pi o manco vinte persone, o dele volte fin de pi. Tante sere se aprofiteva par far la preghiera de'a corona, ma a'i tosati no'i piaseva de'a preghiera, parché gnanca nte'a metá de'a corona, tuti zera belche indormensai. Ma enfati, in quei ani si che noantri zèrino felici, parché se saveva vivar una vita in fameia. Ma dopo i ani se ga passà e ga dato posto par la modernità. Alora rento casa ze vegnesta la television, e cossì, el filò, pimpianeto se ga finio. E insieme a lu, se ga ndato anca la nostra felicitá... Strucanasso a tuti e steme in salute!!

Ouça e divulgue, Ricordi d'itália, todo Domingo, das 7 às 9:30, na Sol d'américa FM 91.1

Comentários