Orgólio de esser taliani! E pi ancora par esser taliani-gaussi!!!
Sexta, 27 de Novembro de 2015

Orco beco...! El ano ze belche drio finirse... nantra volta! Ma gràssie a Dio noantri semo qua ancora in gamba, parlando sora le cose de'i nostri antenati. Par mi ze un vero piaser scriver nte'a léngoa che go imparà ancora tosato, insieme co'i me pupà e noni. Mi vui dir che parlar el talian, no'l ze solche saver parlar sol nantra léngoa, lontan de questo. Parlar el talian, ze rispetar la stória de'i nostri antenati, ze valorisar la eredità par lori lassada, ze onorar la tradission, e soratuto, parlar el talian, ze orgoliarse del'e nostre radise! Noantri qua nte'l Rio Grande del Sud, gavemo un grando orgólio in esser gaussi. Orgólio par le fassagne fate nte'l passà par nostro pòpolo. Ma domando adesso: Se tuto questo orgólio che ze drio corer in nostre vene "gaudèrie", ze par le braure passade del'a nostra giente, quanto de pi orgólio cognemo gaver par esser taliani?! Parché, lo che i nostri noni e bisnoni ga fato - nò sol par el nostro stato - ma par tuto el nostro paese, no ga mia paragon. Parlo qua sensa paura de sbaliar: Se el Brasile se ga svilupà e se ga tornà in questo gigante che l'è, massa se dove al lavoro e vision de'i nostri antenati taliani, che sensa paura del lavoro e come dise la sonada: "Con la indùstria de'i nostri taliani, ghemo fato paese e citá". Come no cavar mia el capel par un pòpolo che qua ga rivà co na man davanti e nantra dadrio e che ze stato sbandonà par el goerno in medo de'i boschi, solche con qualche feramente e una s-cianta de somensa?! Sensa tera pareciada par piantar e sensa un ricòvero par so fameia, ga tocà a'i nostri bisnoni taiar zo le piante, far una caseta, pareciar un tocheto de tera, piantar qualche somensa e spetar mesi fin far la prima racolta par dopo magnar. Ma che con la gràssia de Dio e la forsa de'í soi brassi, ga riussisto in medo a tante tribolassion, vinser la fame, le belve selvadeghe, le malatie, le perseghission e la guera. E se ga tornà cossita nte'l pòpolo sìmbolo de'l svilupamento de questa nassion. Alora taliani gaussi, se volemo esser giusti, ghe ocoremo beter le cose sora la bilància e far come la bìbia ghe insegna: "un solo peso e una sola mesura". Questo ze dir: Se gavemo motivi de gaver orgólio par esser gaussi, magineve alora quanto orgólio par esser gaussi-taliani! Penseve sora questo e ndemo far de pi par el nostro talian...! Bona setimana a tuti e steme in salute! Adesso la fròtola:

Zera la Toni e so fémena sentai, uno sensa vardar nte'a fàcia de laltro. Deboto la fémena domanda a Toni: Toni, dime una cosa: me go smentegà, la seconda guera ga scominsià nte'l ano quarantasìnque o quarantasei? Toni rabioso ga dito: la ze scominsiada nte'l ano quarantaoto, o gheto smentegà anca el ano che se ghemo maridà?!

Invito qua tuta la fameia Candaten par el sètimo incontro nte'l giorno 10 de Genaro de 2016 nte'a cità de Liberato Salzano. Confirmassion traverso i telefoni: 55 9623 4161 o 55 3755 1230 co'l Jandir (Chico) o Juliano.

Comentários