La bàmbola e el anelo... Una bela storieta d'amor!!!
Sexta, 04 de Dezembro de 2015

Ciò taliani..., semo qua nantra volta con la nostra bela léngoa. Incoi me cato medo inmagà su co na bela storieta sora el amor e me piasaria scompartir con voaltri, parquela la meto qua.

"La tosa ghe dise par suo moroso: Doman mi son de compiani. - E lu ghe dise: Mi sò, o catito ti che mi fusse smentegarme d'un giorno importante come questo? - Ela ghe dise: Gràssie, ze parquela che te piaso tanto! - E lu domanda: Cossa vuto guadagnar de regalo? - Se me lasse scoier, me piaseria guadagnar un anelo de'i pi bei. Lu ghe dise che si, daghe un baso a ela e ghe va via. Alora la tosa tuta contenta, ghe va nte'l salon farse su le óngie e rangiar i cavei. Dopo ghe va nte'a lògia e ghe ciapa el meio vesti. Torna indrio, bete su la roba nova, ghe resta bela come una principessa de'i conti de fata e, tuta contenta ghe speta el moroso, che cateva ela, zera ndato tor el anelo par darghe de regalo. Alora el suo moroso riva e ghe dise: Ti te ze pi bela ancora, mi te amo! Gràssie, anca mi te amo, ghe dise ela. Son restà inmagà con tanta belessa, che zera drio smentegarme de'l tuo regalo. Tuta contenta e premosa, ela ghe verde el fagoto e ciapa un spauron. Ela ghe dise: Te go domandà un anelo e ti te me gh'è dato una bàmbola?! Alora rabiosa che se ga deventà, pianta via la bàmbola fora par la finestra e scomìnsia a piander. Alora el toso, presto ghe va adrio par ciapar la bàmbola, ma n'te quela un auto lo ciapa in medo a strada e lo lassa tuto spacà. Alora, quela che zera par esser una festa, se deventa in disastro. I lo ga portado nte'l ospedal, ma no ga mia adiantà, dopo de due ore lu zera morto. La tosa pentia, piande massa, parché ze stato tuto par colpa soa. Nte'l sepolimento del moroso, la tosa piande tegnendo in man la bàmbola. Però, al strucar la bàmbola, la medèsima parla: Felice compiani,..vuto maridarse con mi? Alora in quel àtimo, casca in tera un bilieto che diseva: Ciapa el anelo nte'a scarsela sanca de'a bàmbola, speto che te piase. Mi te amo pi che gieri e manco che doman!"

Con questa bela storieta, ghe vien in nostri pensier, tute le volte che par via del "slusir del oro", lassemo la de darghe el valor par le persone che piasemo e che mèrita el nostro amor! Pensemo sora questo.

Aprofito qua par mandarghe un strucanasso al nostro brau talian Pigatto, lu che ze paron de'l posto Pigatto de'a cità de Iraí. Lu me ga dito che ghe fa letura tute le setimane de'a nostra colona taliana. El ga pi de novanti ani, ma la testa ze d'un giovenoto de disdoti. Ralegramenti a vu talian!

La fameia Candaten invita a tuti i Candati par el suo apuntamento (incontro) nte'l giorno 10/01/2016, che sarà nte'a cità de Liberato Salzano. La confirmassion la pol esser fata traverso i telèfoni: (55) 9623-4161 (Chico Candaten) o (55) 3755-1230 (Chico/Juliano).

Ouça e divulgue: Ricordi d'itàlia, aos Domingos das 7 às 9h30 na Sol d'América FM 91.1

Comentários