El patimento de'i nostri antenati in serca de'a cucagna!!!
Sexta, 11 de Dezembro de 2015

Brai taliani, incoi vedemo sora come viveva i nostri antenati, cossa i feva ntel suo paese e anca cossa i ga fato vegner ntela Amèrica. El me poro nono belche parleva: pimpian se va lontan! Parquesto bel dir, ze bisogno farghe compagno i gàmbari; ndar indrioculo, tornar indrio ntei ani fin rivar ntel cècolo XIX, parché solche cossì saremo boni di capir tuto quel che se adventeva rento ntela Italia in quei tempi, che ga fato metà del pòpolo ndar via del paese. Ntel cècolo XIX, nò solche la popolassion dela Italia, ma anca de tuta la Europa, de una forma general, zera sfondà ntela pelagra. La transission tra i modi dela produssion feudale par el capitalista, ga rovinà dritamente le condissione sossiai in tuta la europa. Le tere ga restada ntela man de un fià de paroni, l’imposti sora le propietà zera alti, cossì feva el ceo propietà domandar soldi imprestai e se ndeviteva. Ghenaveva anca la concorensia scompagna dei grandi paroni rurai, che feva i pressi dei prodoti del ceo restar pi bassi ancora, urtando cossì questa man di òpera par le industrie, che no zera mia boni tegner tuti questi lavoradori, impienindo cossì le cità con desempiegadi par tuti i cantoni. Lora ntela mesura che le cose resteva pedo, milioni de cei contadini, si adventeva lavoradori brassai ntele grande propietà. Stesso quei che seviteva ntela condission de cei padroni rurai, no zera pi boni cavarghe el sustegno dela tera. Questo parché solche i fioi pi vecii dela fameia guadagneva par eredità tuta la tera dopo de'a morte del pupà, mentre i altri fioi zera parai via sensa gnente. Stesso, quando le tere zera spartìe tra i fioi, i frassionamenti resulteva ntel recevimento de un toco de tera massa ceo, parquesto zera impossibile cavar el sustegno par tuta la fameia (che ghe ocor dirlo, zera granda, cramento!). Ntel cècolo XIX, la popolassion dela europa se ga ingrandio due volte e meda, rovinando di pi la situassion in tuto el continente. Al ritratar el Véneto - region italiana di ndove ze vignesto 30% dei imigranti italiani ntel Brasile - el storiador Emilio Franzina ga scrivesto che, “pol morir de'a fame che la ùnica cosa che i contadini ga par magnar, ze la polenta, una olta che la cìcia di bò zera una fàvola e el pan dela farina de formento nissuni ghenaveva schei par cromparghela, parché el prèssio zera alto de pi”. In altre regioni dela Italia e anca in altri paesi europei, la situassion no zera diversa: la fame e la pelagra ghe assoleva tuta la Europa. El contadino ghenaveva una granda passion par el suo toco de tera i tuto el suo viver gireva in torno dela manutension de soa propietà. El suo mondo no ndeva oltre dela comunità in che viveva. Alora, ze stato cossita che milioni de contadini europei se ga adventai emigranti. Prima i ga ndato torghe lavoro ntela cità, dopo ntei paesi vissini quando la man de òpera se torneva pi granda, come ntei tempi dela segatura; dopo i torneva casa. Co questi afari belche no feva pi el efeto che i voleva e che ghe ocoreva par viver, alora i ga scominsià la emigrassion oltre mare, soratuto par i paesi dela Amèrica. E ze stato cossita che el continente americano càpita en questo contesto, come el paradiso insognà par milioni de europei, che imigreva con la promèssia de se adeventar in grandi paroni de tera i cossì farghe la “cucagna”!

Ouça e divulgue: Ricordi D’itália na Sol d’América FM 91.1, todo domingo das 7 às 9h30 da manhã.

Comentários