Le tre piante.... e una bela storieta de nadal!!
Quinta, 24 de Dezembro de 2015

Me par fin che ze stato gierilaltro che mi gera qua desiderando un felice nadal a tuti, e adesso ze nadal nantra volta. Craméntola... Cossita restemo vecii presto presto! Ma par laltra banda, ringrassiemo a Dio par esser qua tuti in gamba, fando la comemorassion de'a nàssita del nostro signor e salvator Gesù Cristo, mia vero? Savemo anca che la maioransa del pòpolo in questo giorno, i fa el ricordo solche de quel vècio con la barba bianca, la borsa rossa, barùcia in testa e la pansa granda, che'i ghe ciama de pupà noel. Ma el pedo de tuto, ze che i ghe insegna a'i cei par domandar i regali a lu, smentegando che l'è Gesù che fa el compiani nte'l giorno de incoi! E che quel "vècio sbrontolon de roba rossa", ze solche una invension par i gnochi guastar i soldi. Ma enfati, ogniun crede in quel che vol, ma credo mi che i veri cristiani, dovaria creder, adorar e onorar quel che ze vignesto par far la salvassion del mondo, compagni ga fato i tre re magi. Ze un gran pecà che'l mondo ghe va adrio a le tradission de'i òmini, pitosto la verità e benedission de Dio. Adesso betemo qua una bela storieta che ghe parla sora el amor de Dio par noantri.

Gaveva nte'a montagna, tre cee piante che insogneva cossa esser dopo grande e taiade zo. La prima ga dito: "Mi vui esser un baul, pien de tesori". La seconda ga dito: "Mi vui esser un grando bastimento, par portar ree e regine!" La tersa pianta ga dita: "E mi vui restar qua, in pie in questa montagna, par che tute le persone quando me varda, i alse i so ocii e se ricorde del nostro Dio!" Tanti ani se ga passà e qualche giorno de quei, ga rivà tre boscaioli e'i ga taià zo le tre piante. Tute le tre bramose par esser deventade in quel che insogneva esser. Ma pareva che el destin no voleva far compagno i soi insogni. La prima se ga adeventà n'te un àlbio par le bestiame magnar rento. La seconda se ga adeventà n'te una sèmplice e cea barcheta, menando pessi e persone tuti i di. La tersa, che insogneva restar in pie nte'a montagna, se ga adeventà in baroti grandi e metesti d'una banda e smentegai rento n'te un fóntego. E tute le tre se domandeva: "Parché questo?!" Però n'te una note piena de stele, una gióvena dona ga betesto el so bambin pena nassesto, rento n'te quel àlbio de bestiame. Deboto, la prima pianta se ga nicorto che gera drio tegner el magior tesoro del mondo! La seconda pianta, ani dopo, gera drio menar un omo che se ga indormensà e co la tempesta gera drio rabaltar la barcheta, questo omo se ga alsà e ga dito par el vento sorarse e el mar chietarse, e cossì se ga fato. Deboto, la seconda pianta ga capio, che gera drio menar el re del cielo e de'a tera. Ani dopo, n'te un vendre, la tersa pianta se ga spaurà quando i soi baroti i ze stati ligai in forma de croce e un omo ze stato ciodà n'ela. Presto se ga sentio oribile e crudela. Però n'tela doménega matina, el mondo ga saltà de alegressa e la tersa pianta ga capio che n'ela se gaveva inciodà el omo che salveva el mondo, e che a'l vardarla, le persone se recordaria de Dio e de so fiol Gesù Cristo! Ouça Ricordi d'Itàlia, aos Domingos, das 7 às 9h30 na Sol d'América Fm 91.1

Comentários