Trenta sei giorni de màchina a vapore...ntela mèrica semo rivai!!
Sexta, 08 de Janeiro de 2016

Ècolo brai taliani,...semo rivai nantra volta! Stimana passà ghenavemo visto sora come i nostri antenati i ga fato par vegner fora del suo paese; incoi sevitemo con la stòria e femo un vero viaio insieme con lori rento ntei bastimenti, fando un raconto de tuto che i ga patio fin rivar ntel Brasile! Alora, una volta rento ntel bastimento, i nostri antenati ghenaveva de far un terìbile viaio che dureva pi de trenta giorni, tuti imuciai su, dele volte fin insieme con le bèstie! Parquela, no zera ciari i velenamenti par magnari smarsi, morti par la malatìa i tanti furti. Ntel ano de 1888, ntei due bastimenti- el Matteo Bruzzo i Carlo Raggio- 52 persone ze morte dela fame e, in 1899, ntel bastimento Frisna, 24 persone ze morte sofegai, pestai sora par altri tanti che vigneva imuciai. Ma el pi grando disastro ze stato ntel ano 1906 con el bastimento Sìrio, ma sora questo parlemo nantra ora, parchè ze stata cosa bruta! Ma infati, quando gl'imigranti riveva ntel porto brasilian, i se maraviglieva con el verdo dela natura e stragneva i omi e done con altro color ( negri), che camineva ntel porto, parchè mai visto roba compagna ntel suo paese. Alora, dopo de restar quaranta giorni ( quarentana) ntei staleri del goerno, zeri menai par lavorar ntele asiende de cafè, ndove arquanti imigranti ga infrentà una vita de schiavi, ben diverso dei relati del paradiso fati par i agenti che i ga persuadisti lassar la Itàlia. Parquesto lora, un numbro massa elevà de imigranti, ga ritornà par la Itàlia o, ndati par i altri paese. Tra i ani de 1882 fin 1914, ga vignesti rento ntel estato de San Paolo 1.553.000 imigranti, e de questi, 695.000 i ga tornà indrio, o sìpia: pi o manco 45% del total. Tra quei che ga ritornà par la Itàlia, ga restà ntela lembransa stòrie tràgiche che fin incoi ze ntela memoria dei fioi, nipoti i anca bisnipoti de quei cha ga ritornà. Però anca ga restà ntele memorie, lembranse de cose bone de qua del Brasile, come dele frute tropicai che mai pi i magnaria ntela vita. Belche quei che i ga restai qua, i ga scominsià una nova vita con tuta la fameia, i ga infloensià ntela formassion de questa nassion in diversi aspècti, giutando cossita ntel svilupamento del paese, ntela banda sossiale e econòmica. Par incoi ze questo, stimana che vien parlemo sora la colonisassion qua ntel sud del paese. Soto, una fròtola par rider una s-cianta. " Alora una volta, Bepi gera drio ndar rento ntel banco insieme con la so sòcera ( sogra), quando el ga visto, vigneva fora drio corer un ladro che ghenaveva pena furtà el banco.Vanti de scampar via, el ladro se ferma darente de un omo e domanda: gheto visto qualche cosa qua? Si, ghe dise el omo; te go visto ciapando i soldi! Lora el ladro daghe una s-ciopetada e copa quel omo! Alora lu varda el Bepi e dise: e ti, gheto visto qualche cosa? Mi nò, dise el Bepi; ma la me sòcera qua ga visto tuto!!"... Manco contento ga restà el Bepi, nò?! Strucon di vero cuor e salute par tuti quanti!!!

Ouça e divulgue o programa talian Ricordi d’itália na rádio sol d’américa FM 91.1 todo Domingo das 7 às 9:30 da manhã.

 

Comentários