Bon princìpio... bona salute... soldi nte scarsele e pansa piena!!!
Sexta, 15 de Janeiro de 2016

Carissimi taliani letori de questa colona, ghemo rivà ntel fin de'l an nantra volta! Someia fin na busia, parché me par che ancora gieri el ano zera drio scomìnsiar! Ma enfati, semo qua e vanti che voaltri ndé ciamarme de sbrontolon, vui dir che semo contenti par traversar nantra volta el ano con la gràssia de Dio. D'le volte sito drio dir: "Mi no go mia gnente par ringrassiar, parché el an ze stato un tanto bruto par mi!". Par ti che cata cossì, mi son sicuro in dir: "Proa darghe na vardada indrio e con tuta la sicuressa ti te catarè quei che ze diese volte pedo che ti". Ze de'a natura umana sbrontolar sora tuto, medèsimo quando la benedission de Dio ze sora so testa. Noantri sbrontolemo del goerno ( con reson), del lavoro, dei pupà, de'a scola, del sol, del'a piova, de'a salute e fora via... Sol no semo mia boni sbrontolar dela nostra persona, parché catemo che semo boni in tuto che femo e no ghemo mai comesso sbalii, no ze pròpio cossì?!

Enfati, invito a ti par insieme a mi, aprofitar questo scomìnsio de an, par far una renovassion ntel'a nostra vita. Una renovassion nte'i nostri pensieri, nte'l cuor, ntel'a ànima. Par che cossita, poler far un giro de trecentosessanta gradi nte'l trodo che semo drio ndar, ciapar el sentiero raverso e far le cose bone che no ghemo mia fato in questo ano che ze ndato. L'è compagna ghe parla la bìbia: "Vanti de cavar el bacheto che ze nte'l òcio de'l to fradel, cava prima el barote che ze nte'l tuo". Lassemo là de vardar solche i defeti de'i altri. Parché fin che semo drio vardarli, smenteghemo che anca i altri i ze drio vardar i nostri defeti (che'i ze una mùcia), e cossì el mondo se impienisse de barufa, de persone invidiose, piene de ràbia e mancose de rispeto. Se volemo cambiar el mondo, ghe ocor cambiar solche una persona: a noantri medèsimi! Parché nte'l di che semo boni de cambiar la nostra vita, in questo di, el mondo ghe resta meio par se viver. L'è come dise el dir: "Noantri sariano persone meio, se no volesseno esser tanti boni". Betemo questo pensier nte'a testa e ndemo avanti, trovando far sol quel che ghe piase a Dio e nò vardando solche par el nostro bunìgolo!

Lasso qua un strucanasso a tuti, co'l desìdero d'una bona salute e soldi fin vegner fora par i òcii. Enfati, a tuti i auguri de un bon princìpio, con tuta la gràssia e benedission de Dio!!

Ouça o programa Ricordi d'itàlia. Aos Domingos, das 7 às 9h30, na sol d'américa FM 91.1
 

Comentários