Trova far le cose de'a to testa ... e nò cossa i altri ghe dise!!
Sexta, 22 de Janeiro de 2016

Ciao brai taliani! Qua semo nantra volta con la gràssia de Dio. El novo ano ga belche scominsià, pieno de proieti sora cossa far in questo ano. Mi so che tante persone ga plani par questo ano. So che anca ti se ga permesso slevar qualche proieti e pénsito in farli. Mentre mi brindeva la stravolta del ano, me go permesso una riflession; le persone i desidere sempre el meio, ghe vole un ano difarente e meio, ma no se incorze che questo sol va suceder se i ghe fa i scàmbii de qualità in so vita, caso raverso, tuta questa animassion ga da esser "fogo nte'i scartossi" che ghe passa pena dopo finide le vacanse. Se ti te vui che cose maraveiose ghe sucede in to vita, ghe ocor scominsiar a deventar qualchedun maraveioso. E come se fa questo? Se fa con la atitù, parché la secretessa del sucesso la ze ntele pìcole cose che tante volte no gavemo la consiensia, ma che ingambara i resultai.

El mio consìlio l'è che ti controle le emossion e che trova ciapar la consiensia dei cei passi che sito drio dar, parché el sucesso l'è una question de dissiplina, de se mantegner ntel camino drito fin atìnger el scopo sielto. La dissiplina la ze capace de far ti ciapar el sentiero drito de to vita, de far ti vinter i oponenti che sicuramente veto trovar nte'l camino. Ma ndove ze e chi che i ze questi oponenti? I ze pi darente che pénsito. I ze le persone che'i ze nte to banda, ansi, le persone pi darente de ti, ze le persone che te pol far scambiar de idee presto presto. Parquela, in questo ano, trova far le cose che vien fora de to testa, e nò lassarte menar par i pensieri dei altri.

Adesso la fròtola de'a setimana: El porta létere ghe riva nte'a casa del Gioanin e co fa finta de meter el pie rento ntel cortivo, ghe vede un cagneto co na bruta ghigna, someiando massa rabioso. Alora el porta létere ghe domanda par el tosatel Gioanin, che zera sentà ntel scalin de'a scala: Tosato, ze cativo el tuo cagneto? Nó, ghe dise Gioanin. El mio cagneto no morsega nissuni. Alora fidandose nte'a parola del toso, el porta létere ghe vien rento ntel cortivo par menar la létera al Gioanin, però mentre questo, el cagneto vien par de drio e ciapa le due gambe del poro omo, sbregando le braghe e le pùpole dele gambe. El sfortunato omo scomìnsia a corer fora del cortivo, dopo torna indrio e ghe osa par el Gioanin: Bruto can del òstrega! Te go damandà se el tuo cagneto zera cativo, me gheto dito che nò parché?! Varda cossa el me ga fato adesso! El Gioanin sensa intrigarse con quel, ghe dise: Mi te go dito che el mio cagneto ze manso e che no morsega nissuni; ma questo cagneto qua no ze mia el mio nò, questo ze de'a me sorela.

Ouça e divulgue o programa Ricordi d'itàlia, aos Domingos, das 7 às 9:30, na Sol d'américa FM 91.1


 

Comentários