E cossì ghemo fato la mèrica!!!
Sexta, 26 de Fevereiro de 2016

Alora ciò taliani, incoi metemo qua un toco d'le cose d’sti ani indrio dei nostri antenati, de come i viveva, cossa lori feva i piaseva, i anca la léngua che parleva. Con questo, volemo menar a voaltri un toco dela Itàlia che'i nostri brai imigranti ga trato qua quandi vignesti del suo paese e lassà par noantri par eredità. Cossita copemo la nostàlgia e tornemo a viver le cose bone del passà, par no smentegarse dele nostre radise!

Scominsiemo lora a parlar sora el nùmaro dei taliani e region che i l'è vignesti dela Itàlia: Ntel periodo trà i ani di 1875 fin 1920, ze vignesti de'a region del Véneto, 365.710 imigranti. Dela Campània, 166.080; dela Calàbria, 113.155; dela Lombardia, 105.973; del Abruzzo-Molise, 93.020; dela Toscana, 81.056; dela Emilia-Romagna, 59.877; dela Basilicata, 52.888; dela Sicìlia, 44.390; del Piemonte, 40.336; dela Puglia, 34.833; del Marche, 25.074; del Lacio, 15.982; dela Úmbria, 11.818; dela Ligùria, 9.328; e dela Sardegna, 6.113. I così el Brasile ga ricevesto 1.225.633 imigranti solche in questi ani.

Ghe ocor qua ricordar che in quei ani sora mensionai, la Itàlia ghenaveva pena fato la unificassion, i traverso la guera ghenaveva conchistà la region che adesso ze el nord del paese. La region del Véneto i ga “ciàvado” dela Àustria e in manco di 20 ani, el pòpolo, la maioransa fato di contadini (coloni), i se gaveva adeventà poareti, sensa lavoro e gnente par magnar, e ze parquela che la granda maioransa d’imigranti l'è vignesti dela region del Véneto, parchè ghe ocoreva scampar dela guera i anca dela fame! I riveva ntel Brasile in cerca dela “cucagna”, trando insieme la léngua che i parleva, o sìpia, la léngua véneta. Ze bono anca ricordar che in quei ani, la Itàlia, ancora no ghenaveva una léngoa ofissial, cosa che ga ocoresto ani dopo.Par esser la maioransa d’imigranti vignesti del Véneto, se ga fato prevaler questo dialeto tra i primi imigranti, i fin incoi noantri dessendenti de taliani, doperemo questa léngoa par parlar. 

Incoi semo pi di 30 milioni di dessendenti taliani ntel Brasile, e de tuti questi, pi di un milion ghe parla el talian, la léngua veneta brasilan. Cossì incoi, la nostra bela léngoa taliana, ze la seconda pi parlada qua a Brasile, restando indrio solche del portoghese. Ma sora questo e anca de come se ga fato questa léngua traverso i ani, tra altre tante cose, volemo parlar ntela pròssima oportunità. Saluto i un gran strucon!

Ouça e divulgue: Ricordi D’Itália na Sol d’América FM 91.1, todo domingo das 7 às 9h30 da manhã.

Comentários