Taliani... la ora de far qualcossa ze adesso!
Quinta, 24 de Março de 2016

Alora ciò taliani, l'è con piaser che rivemo qua nantra volta par parlar sora le cose de'i nostri noni. Incoi mi vao discorer sora tuto che in questo àtimo ze drio suceder par mantegner viva e anca svilupar de pi la nostra coltura taliana. Giente, par voialtri che caté che noantri taliani semo due o tre "gati pingai", vui adesso dir che: qua a Brasile, semo pi de trenta milioni (semo una nassion rento de quealtra), ve parlo anca che, qua a Brasile, noantri gavemo squasi meso mila programi taliani, fati tuto nte'a léngoa taliana. Gavemo anca nte'l talian: giornai, reviste, libri, dissionarii,scritori, cantadori, giornaliste, storiadori, scola, corsi, programa de television e cossì via; tuto fato nte'a léngoa talian. Enfati, l'è el nostro mondo talian qua a Brasile. Son sicuro che qualchedun te ga belche dito che, parlar el talian, l'è par giente gnorante, poareti, coioni; parché el nostro talian ze na léngoa de veri "stupidi" coloni! Mi anca go belche scoltà raquante volte persone parlando cossì, ma el pedo ze, che queste brute parole, ghe vien de quei che se dise "taliani"! Me fa fin pecà! Però, i nostri "taliani", no sa mia che ancora del giorno 18 de Noviembre de 2014, la nostra bela léngoa taliana ze stata ricognóssua par el Iphan (Instituto do Patrimônio Histórico e Artístico Nacional), come una léngoa oficial qua a Brasile. Quei che se ciama"taliani", no sa mia che: el nostro talian ze la seconda léngoa pi parlada qua a Brasile, ghe resta indrio solche del portoghese. Son sicuro che se tuti i nostri taliani savesse de tuto questo, alora i ndeva far qualcossa par giutar a svilupar la nostra coltura, le nostre tradission, le nostre radise.

Taliani... femo qualcossa par mantegner la nostra léngoa. Ensegnemo ai nostri fioi e nipoti a parlar questa léngoa, che ze una dele léngoe pi antiche del mondo ancora parlada. Gavemo in man un vero tesoro, parquela, aprofitemo e femo una bona doperada de questo tesoro, fin che ghemo salute par far qualcossa, parché dopo, piander no adianta mia gnente!

Acesse www.agtv.com.br/radio e ouça o programa talian Radisa Véneta, de 2ª a 6ª feira, das 8h00 às 9h30 da manhã, e das 17h00 às 18h00.

Ouça o programa talian Ricordi d'Itàlia, na Sol d'América FM 91.1 todo domingo, das 7h00 às 9h00 da manhã.

Comentários