Nono Abramo e so orelòio... Una bela storieta!
Sexta, 08 de Abril de 2016

Come femo tute le setimane, qua semo nantra volta par meter su qualcossa del nostro talian. Incoi mi vui meter qua, una bela storieta che la me ga racontada el brau talian e anca mio vero amico, Jonir Piaia. E sora questa storieta, che secondo lu la ze de tuta vera, ze roba de gnanca creder, ma come mi lo sò che lu no ze mia un busiaro, alora lo credo e ciapo come una verità. Un bel toco de'a nostra region se ga fato sentir belche dir del brau talian Abramo Piaia, mia vero? Alora, lassa star che questo brau talian, vegne esser el nono del Jonir e ze parquela che lu sa dir questa storieta de òcii sarai.

Alora ndemo al'a storieta del Jonir: "Valtri tuti savé che le cose che se feva sti ani indrio, zera come i serni de angichi, no se finia pi. Cossita zera anca co'i orelòii. E el nono Abramo, anca lu gaveva un orelòio de questi, fato ancora ntel ano 1911 (pi o manco). Savé anca che questi orelòii, zera de portar ntele scarsele intacado co na cadenela, par paura de perderli e anca parché no'i gaveva mia la polsera par meterli intacà ntel bràssio, alora quando se voleva veder le ore, o anca quando se bisogneva girarghe la sfera (darghe corda) par el orelòio no fermarse mia de lavorar, zera solche darghe una tirada in questa cadenela e là zera el orelòio in man. Cossì lo feva anca el nono Abramo co'l suo par arquanti ani. Ndove ndeva, là zera insieme el suo "tondo", cossita no se ciapeva mia indrio ntele ore, se ben che a'i nostri noni, basteva solche vardar la ombria e se saveva dir la ora giusta, co'i minuti e par devolte anca i secondi, mia vero?! - Ma un bel giorno de quei, dopo de arquanti di che gaveva taià zo un toco de scapoere su nte'a riva (ghe ocor dirghe qua, che in quei ani se podeva taiar zo tuto che se vedeva davanti de'i òcii) , zera belche ora del nono Abramo sbrusarla, par dopo piantar el fasol. Parché i meii fasoi, vegneva su ntele tere vèrgine, ndove nissuni gaveva piantà gnente ancora. Ben, ben,..mentre el nono Abramo "pianteva" su el fuogo de una banda a laltra, par òpera del destin, el vento deboto, a brusapel se ga scambià de banda e lu se ciapa in medo co'l fuoco in so fianco e dadrio.....Sevitemo con questa storieta setimana che vien. No sté mia perderla, vito?!

Acesse www.agtv.com.br e ouça: Radisa Véneta, de 2ª a 6ª, das 8 às 9h30 e das 17 às 18h.

Sintonize 91.1 Sol d'América FM e ouça: Ricordi d'Itàlia, aos domingos, das 7 às 9 da manhã.

Comentários