Nono Abramo e so orelòio!Una bela storieta! (secondo toco)
Sexta, 22 de Abril de 2016

Bravi taliani, come la vala? Incoi sèvito co'l raconto fin finirla, de'a storieta del nono Abramo Piaia. Quela storieta che me ga contà el suo nipote Jonir la nte'a ràdio a due setimane adrio. Alora sevitemo d'andove se ghemo fermà setimana passà: "Femo el ricordo de che el nono Abramo, mentre zera drio meter fuoco ntele scapoere, se ga ciapà in meso. Alora, par no sbrusarse su come una bissa, ga tocà corer via. E cossì se ga sevità a corer par due chilometri. Dopo fermà, se ga incorzo che insieme co'i sinele, el gaveva perso anca el so stimà orelòio. Ma casso, farghene cossa adesso?! Tornar indrio in meso el fuoco par catarlo no ghe deva mia, alora ga molà man d'sto benedeto orelòio e ga tornà casa canso e sbatuo. Diesi ani dopo, zera la el nono Abramo in meso del medèsimo bosco, co la s-ciopa in man par copar i colombi (che ghenaveva una mùcia in quei ani), nte quela lu se ferma, parché lo pareva sentir el tiche-tache del so orelòio. Ga rivà pi darente, alora lu lo ga vedesto, zera là meso sconto rento un buso soto una radisa. Come ze possìbile?! ...ga dito el nono! Dopo de tuti questi ani perso, ze ancora drio funsionarghe! ...ma come cossita?! Mentre el nono penseva sora questo, ga varda pi avanti e zera la una bruta bissa drio vegner nte'l medèsimo trodo che se cateva el orelòio. Spaurà e anca par no esser bauco, el nono se ga piantà de una banda, mentre la bissa sbrissieva tra le piantele fin che se ga passà anca par el orelòio. Ma lassa star che come el orelòio zera giusto nte'l trodo de'a bissa, el nono ga vedesto che mentre la bissa passeva, ciapeva giusto sora la rodela che pareva le sfere e cossì, zera la bissa che tuti i di gireva la rodela e no lassava mia el orelòio fermarse de lavorar. Cossì el nono ghe copa la bissa co na s-ciopetada e contento che mai, porta casa insieme, el suo stimà orelòio che sensa dùbio, gaveva costà qualche conti de reis."

Quando el Jonir me la ga racontada questa storieta, mi no voleva mia creder, ma alora el ga messo la man nte'a scarsela e porta in su el centenàio orelòio che ga guadagnà come eredità del so nono Abramo. Alora mi lo go credesto, parché nte'a rodela del orelòio, ga fin adesso el segnal de ndove passeva la coa de'a bissa. E se dele volte voaltri no credé mia, domandé par el Jonir Piaia che lu ghe mostra questo benedeto orelòio!

Acesse www.agtv.com.br e ouça: Radisa Véneta, de 2ª a 6ª, das 8 às 9h e das 17 às 18 h.
Sintonize 91.1 Sol d'América FM e ouça: Ricordi d'Itàlia, aos domingos, das 7 às 9 da manhã.

Sintonize 95.9 Luz e Alegria FM e ouça: Mondo Talian, aos sábados, das 8 às 9 da manhã.

 

Comentários